สวัสดีจ้าพี่น้อง แม่ครัวฝึกหัดมาส่งการบ้านจ้ามื้อนี้
หลังจากลักหนีไปหาเลาะ หานอนเว็น ตามกะเยิม 
แท้ๆไปหาลักยามไซ ยามเบ็ดขะเจ้า นั้นละจ้า (เว้าเล่นเด้อจ้า)
ได้ปลามากะสิเฮ็ดปลาแดกไว้กิน มาเด้อจ้ามาเฮ็ดนำกันจ้า
สูตรเฒ่าแม่บอกมาจ้า ปลาแดกเลาแซบๆจ้า หอมนำ
สูตร สัดส่วนคือ ปลา(อิหยังกะได้)1กก.ต่อเกลือเม็ดใหญ่ 3ขีด
รู้สูตรแล้วก็มาจัดการกันเลยน้อจ้า มาเด้อจ้าไปสิขอดเกล็ดปลาช่วยแม่ครัวฝึกหัดจ้า

 
ปลา(ซาร์ดีน) 1กก.+เกลือเม็ดใหญ่3ขีด (ตำจักหน่อยเด้อจ้าพอแตก)

 
ทำความสะอาดปลาแล้วพักให้สะเด็ดน้ำ และใส่เกลือลงไป

 
ซาวปลากับเกลือให้เข้ากันจ้า อย่าคั้นแฮงเด้อจ้าปลาสิมุ่นจ้า
ซาวจนเกลือจะเข้าไปในเนื้อปลาจ้า ซาวแล้วพักประมาณ5นาที
แล้วกะซาวอีก แบบนี้จัก3-4รอบจ้า รับลองปลาบ่เน่าแท้จ้า
เสร็จแล้วกะเอาใส่กระปุกหรือไหจ้า

 
ปิดฝาให้สนิทแล้วเอาผ้าห่อบ่ให้แสงเข้าไปได้จ้า
เพราะถ้าถูกแสง ปลาแดกจะดำจ้า ตอนนี้รู้แล้วแม่นบ่จ้า
ปลาแดกคือต้องอยู่ในไห  หมักเดือนหนึ่งเด้อจ้า
เพราะถ่าหมักนานกว่านี้เกลือจะเข้าในเนื้อปลามากเกินไป เฮ็ดให้เค็ม บ่แซบจ้า 

1เดือนผ่านไป 
เตรียมเครื่องที่จะซาวปลาแดกอีกรอบจ้า
1.ข้าวจ้าว2ถ้วยตรง เอามาคั่วให้เหลืองแล้วบดหรือตำให้ละเอียด
ทิ้งไว้หนึ่งคืน ถ้าคั่วแล้วตำเอามาซาวใส่เลย ปลาแดกจะส้มเด้อจ้า ต้องทิ้งไว้ข้ามคืนๆ1จ้า
(ข้าวคั่วถ้าเอาข้าวเหนียวมาเฮ็ด ปลาแดกจะส้มจ้า)
2.น้ำเปล่า 1 1/2 ลิตร ต้มให้เดือด แล้วทิ้งให้เย็นข้ามคืน
 
ครบเดือนพอดีมาเบิ่งจ้าเน่าหรือบ่ 
เทออกมาเบิ่งจ้า โอ้ บ่เน่าจ้า ฮิ้ววมาเด้อขวัญเอ้ย
 
ใส่ข้าวคั่ว แล้วซาวให้เข้ากันจ้า หาถุงหรือถุงมือยางมาใส่เด้อจ้า
ยามซาวกลิ่นปลาแดกจังบ่ติดมือ เดี๋ยวจะหาว่าบ่เตือน เหม็นติดมือบ่ได้นอนเด้จ้า  
 
ซาวเสร็จก็เติมน้ำที่ต้มไว้ลงไปจ้า
ใส่มากหรือน้อยขึ้นอยู่กับความมักเด้อจ้า
แม่ครัวฝึกหัดมักแบบน้ำหลายๆใส่ไป1 1/2ลิตรจ้า

Bump:

 
เสร็จแล้วก็เอาใส่กระปุกหรือไหจ้า หมักให้ได้อย่างน้อย3เดือน
ก็เอาออกมากินได้จ้า หาอิหยังห่อกระปุกไว้อย่าให้ถูกแสงเด้อจ้า
เดี๋ยวปลาแดกจะสีบ่งาม ดำบ่น่ากินจ้า ปลายธันวาคม2553จังมาชิมนำกันเด้อจ้า

 ขอบคุณสำหรับพื้นที่และทุกท่านที่แวะมาเยี่ยมชมกระทู้จ้า
หวังว่ากระทู้นี้สิมีประโยชน์สำหรับพี่น้อง ที่หลงไหลในรสปลาแดกเด้อจ้า
สูตรนี้เฒ่าแม่ได้มาโดย ขึ้นรถไปหาหมออยู่ อ.นางรองจ้า 
แต่ก่อนเลาเอ็ดยามได๋ คนได้นอนนอกบ้านจ้า เหม็นปลาแดก
สุมื้อนี้เฮ็ดแล้วบ่คู่กันกินจ้า  เปิดโรงงานปลาแดกให้แล้วสะบ้อจ้า คิคิ

ขอขอบคุณแหล่งข้อมูล

บ้านมหา ดอทคอท 

http://www.baanmaha.com